BAKTERIAL VAGINOZ

Taxminan 50% holatlarda bakterial vaginoz hech qanday belgilarsiz kechadi. Qolgan vaziyatlarda quyidagilar kuzatiladi: O‘ziga xos hid: oqish-kulrang tusdagi ko‘p miqdordagi ajralmalar bo‘lib, ulardan o‘ta yoqimsiz, xuddi sassiq baliq hidi keladi. Bu hid ko‘pincha jinsiy aloqadan keyin yoki hayz vaqtida yanada kuchayadi. Ajralmalar bir xil massali (odnorodiy), suyuq va biroz yopishqoq bo‘lib, qin devorlarini tekis qoplab oladi. Kam hollarda — qinda biroz qichishish, achishish yoki peshob chiqarish vaqtidagi noqulaylik. Yallig‘lanishning klassik belgilarining yo‘qligi (oddiy kolpitdan farqli o‘laroq, qin shilliq qavati qattiq shishmaydi va kuchli qizarmaydi).

Bakteriyalar muvozanatining buzilishiga quyidagi omillar sabab bo‘lishi mumkin: Qinni tez-tez va nazoratsiz yuvish (sprintsevaniya): qinning tabiiy va foydali mikroflorasini yuvib yuboradi. Antibiotiklar yoki gormonal dorilar qabul qilish: laktobakteriyalar o‘sishini tormozlaydi. Jinsiy sherikning almashishi (bu venerik infeksiya bo‘lmasa-da, yangi sherikning mikroflorasi ayol qinidagi muvozanatni buzishi mumkin). Bachadon ichki spiralidan (VMS) foydalanish yoki gormonal kontratseptivlarni uzoq vaqt ichish. Umumiy immunitetning pasayishi, surunkali stress, vitaminlar yetishmasligi. Tor, sintetik ichki kiyimlar kiyish va xushbo‘y hidli (atirlangan) har kungi prokladkalardan foydalanish.

Bakterial vaginoz kuchli og‘riqlar bermasa-da, o‘zining salbiy asoratlari bilan xavflidir: Qinning himoya to‘sig‘i buzilgani sababli, haqiqiy jinsiy infeksiyalarni (OIV, so‘zak, xlamidioz) yuqtirib olish xavfi keskin ortadi. Ginekologik operatsiyalar yoki tug‘ruqdan keyin bachadon va uning ortiqlarida yallig‘lanish (endometrit) rivojlanish xavfi ko‘payadi. Homilador ayollarda: bakterial vaginoz muddatidan oldin tug‘ruqqa, kechki muddatlardagi bola tushishiga yoki homila atrofidagi suvning barvaqt ketib qolishiga sabab bo‘lishi mumkin.

Kasallik aniq bosqichlarga ega emas, biroq kechishiga ko‘ra farqlanadi: O‘tkir kechishi: belgilar (hid va ajralmalar) yaqqol namoyon bo‘ladi, ayolga kuchli psixologik va jismoniy noqulaylik tug‘diradi. Yashirin (surunkali) kechishi: alomatlar sust bo‘ladi, yoqimsiz hid vaqti-vaqti bilan paydo bo‘lib turadi. Ayol buni oddiy ajralma deb o‘ylab, yillab shifokorga ko‘rinmasligi mumkin.

Bakterial vaginozni davolash har doim ikkita majburiy bosqichda amalga oshiriladi: 1-bosqich — Zararli bakteriyalarni yo‘q qilish (Antibakterial terapiya): Anaeroblarga qarshi samarali dori vositalari: Metronidazol (Trixopol) yoki Klindamitsin qo‘llaniladi. Ular ham mahalliy (gellar, shamchalar), ham ichish uchun tabletka shaklida buyurilishi mumkin. 2-bosqich — Normal mikroflorani tiklash (Probiotiklar): Birinchi bosqich tugagach, qinni "foydali" mikroblar bilan boyitish va kasallik qaytalanishining oldini olish uchun tarkibida laktobakteriyalar va sut kislotasi bo‘lgan shamchalar yoki gellar (masalan, Laktogel, Femileks, Laktojinal) albatta buyuriladi. Eslatma: Kasallik surunkali ravishda tez-tez qaytalangan holatlardan tashqari, odatda erkak sherikni davolash talab etilmaydi.

Shifokorning to‘g‘ridan-to‘g‘ri ko‘rsatmasisiz qinni ichkaridan yuvishdan (sprintsevaniyadan) butkul voz kechish. Intim gigiyena uchun neytral yoki sust kislotali (tarkibida sut kislotasi bo‘lgan) maxsus vositalardan foydalanish. Har kungi xushbo‘y hidli prokladkalar va tamponlardan foydalanishni cheklash. Antibiotiklarni faqat shifokor tavsiyasi bilan, o‘rinli qabul qilish (va parallel ravishda probiotiklar ichish). Paxta matosidan (xlopok) tikilgan, tanani qismaydigan kengroq ichki kiyimlar kiyish.