GLAUKOMA

Ochiq burchakli glaukoma uzoq vaqt davomida simptomsiz kechadi ("ko‘rishning yashirin o‘g‘risi"). Yopiq burchakli glaukomada esa o‘tkir xurujlar kuzatilishi mumkin: ko‘zda va boshda keskin kuchli og‘riq, ko‘z qizarishi, ko‘rishning to‘satdan pasayishi, yorug‘likka qaraganda kamalaksimon doiralar ko‘rinishi, ko‘ngil aynishi va qusish.

Asosiy sabab — ko‘z ichi suyuqligi aylanishining (oqib chiqishining) buzilishi natijasida KIBning ko‘tarilishidir. Xavf omillariga genetik moyillik (nasldan-naslga o‘tish), yosh (40 yoshdan oshganda xavf ortadi), yuqori darajadagi miopiya (yaqindan ko‘rish) yoki gipermetropiya, qandli diabet va arterial gipertenziya kiradi.

Glaukomaning eng og‘ir va qaytmas asorati — ko‘ruv nervining to‘liq atrofiya bo‘lishi (nobud bo‘lishi) va buning natijasida kelib chiquvchi qaytmas ko‘rlikdir. Glaukomaning o‘tkir xurujida bir necha soat ichida ko‘rish qobiliyatini butunlay yo‘qotish xavfi mavjud.

Shakli bo‘yicha o‘ziga xos tarzda ochiq burchakli (keng tarqalgan) va yopiq burchakli turlarga bo‘linadi. Kasallik ko‘rish maydonining torayish darajasiga ko‘ra 4 ta bosqichdan o‘tadi: I — boshlang‘ich (ko‘rish maydoni chekkalari normal), II — rivojlangan (paramarkaziy o‘zgarishlar), III — uzoqqa ketgan (ko‘rish maydonining keskin torayishi, naychasimon ko‘rish), IV — terminal bosqich (to‘liq ko‘rlik yoki yorug‘likni sezish qobiliyatining qolishi).

Davolash KIBni pasaytirish va ko‘ruv nervini himoya qilishga qaratilgan. Konservativ usulda ko‘z ichi suyuqligi ishlab chiqarilishini kamaytiruvchi yoki oqib chiqishini yaxshilovchi maxsus ko‘z tomchilari buyuriladi (muntazam, bir umr tomiziladi). Dori vositalari yetarli effekt bermasa, lazerli terapiya (lazernaya trabekuloplastika) yoki mikrojarrohlik operatsiyalari (trabekulektomiya — suyuqlik oqishi uchun yangi yo‘l ochish) o‘tkaziladi.

Glaukomadan himoyalanishning yagona chorasi — erta tashxislashdir: Muntazam tekshiruv: 40 yoshdan oshgan har bir kishi yilda kamida 1 marta oftalmolog ko‘rigidan o‘tib, ko‘z ichi bosimini o‘lchattirishi shart. Irsiy omil nazorati: Oilasida glaukoma bilan og‘rigan bemorlar bor shaxslar ko‘z tekshiruvlariga yanada e’tiborli bo‘lishlari lozim. Yuklamalarni cheklash: Kuchli jismoniy zo‘riqishlardan, uzoq vaqt boshni pastga egib ishlashdan va qorong‘i xonada uzoq vaqt gadjetlardan foydalanishdan qochish.